Numquam satis basiorum
Metrum: Phalaecius versus hendecasyllabus
Quaeris, quot mihi bāsiātiōnēs
tuae, Lesbia, sint satis superque.
Quam magnus numerus Libyssae harēnae
lāserpīciferīs iacet Cyrēnīs,
ōrāclum Iovis inter aestuōsī
et Battī veteris sacrum sepulcrum;
aut quam sīdera multa, cum tacet nox,
furtīvōs hominum vident amōrēs:
tam tē bāsia multa bāsiāre
vēsānō satis et super Catullō est,
quae nec pernumerāre cūriōsī
possint nec mala fascināre linguā.